Depresyon: Konsèy Pou w Ede Tèt Ou

Pran swen ou

• Edike tèt ou. Li bagay ki pale sou opsyon tretman ak medikaman. Si w gen enèji a, ale nan konferans oswa nan gwoup sipò lokal yo. Konsève yon lis sit entènèt itil ak liv ki itil epi sèvi ak yo si sa nesesè. Se pa fòt ou si w malad. Pa blame tèt ou poutèt depresyon w lan.

• Jere premye sentom yo. Si w remake sentom yo retounen, si w gen eleman ki deklanche yo, oswa w idantifye lòt faktè ki ka debouche sou yon epizòd depresif, mande èd pi vit posib. Mande zanmi ak fanmi ou fè konfyans pou siveye konpòtman w epi pou yo fè w konnen si yo wè yon bagay ki sispèk.

• Travay avèk founisè swen sante w la. Jwenn yon founisè ou fè konfyans. Kominike onètman ak moun sa a. Pataje enfòmasyon sou tretman pou depresyon w lan ak reyaksyon w parapò ak medikaman yo. Ou ka petèt dwe eseye plizyè medikaman anvan ou jwenn sa ki bon an.

• Prepare w pou yon kriz. Konnen kisa pou w fè si w gen yon kriz. Kenbe nimewo telefòn yon liy sèvis asistans sou men si w gen yon kriz. Konnen ki kote sant swen ijan kominote w la ak sèvis ijans ki pi pre a ye.

• Kanpe sou gwo desizyon yo. Depresyon ka twouble jijman ou. Kidonk, tann jiskaske ou santi ou mye anvan ou pran gwo desizyon nan lavi w. Sa yo gen ladan yo chanje travay, demenaje, achte yon bagay ki chè anpil, oswa marye oswa divòse.

• Gen pasyans. Soti anba depresyon se tout yon pwosesis. Pa dekouraje si sa pran w kèk tan pou w santi w mye.

• Rete senp. Depresyon bwè enèji w ak konsantrasyon w. Kidonk, ou p ap ka fè tout bagay ou te abitye fè yo. Fikse ti objektif epi fè sa ou kapab.

• Rete bò kote lòt moun. Pa izole tèt ou—w ap sèlman santi w pi mal. Eseye rete bò kote lòt moun. Epi patisipe nan aktivite ki amizan lè w kapab. Ale nan sinema, nan yon match, nan sèvis relijye, oswa nan yon evènman sosyal. Pale san dètou ak moun ou fè konfyans. Epi aksepte èd yo ofri w.

Pran swen kò w

Moun ki gen depresyon souvan pèdi anvi pou yo pran swen tèt yo. Sa ki fè pwoblèm yo a vin pi mal. Pandan epi apre tretman an, mete aksan sou:

• Egzèsis. Se yon bon fason pou w pran swen kò ou. Epi etid yo montre egzèsis ede konbat depresyon. Vize 30 minit aktivite modere pa jou. Mache pa ti blòk tan (5-10 minit) se yon bon fason pou w kòmanse, men nenpòt bagay ki fè w bouje (jadinaj, netwaye kay) konte.

• Pa pran ni dwòg ni alkòl. Bagay sa yo ap sèlman pase doulè a pou yon ti tan tou kout. Men, y ap sèlman fè pwoblèm ou yo vin pi grav ofinal.

• Soulaje estrès. Mande founisè swen sante w la pou l di w kèk egzèsis ak kèk teknik detant ki ka ede w soulaje estrès. Konsidere aktivite tankou meditasyon, yoga, relaksasyon miskilè pwogresif, oswa tai chi.

• Byen manje. Yon rejim ki ekilibre epi ki sen ede kenbe kò w an sante.

• Dòmi ase. Vize 8 èdtan somèy chak swa. Dòmi twòp oswa pa dòmi ase ka lakoz lòt pwoblèm fizik ak emosyonèl.