Pangangalaga sa Sarili ng mga Adulto para sa Sipon

Alamin ang tungkol sa lagnat

• Sukatin ang iyong temperatura nang ilang beses sa isang araw. Kung ang lagnat mo ay  100.4° F ( 38°C ) o mas mataas sa loob ng higit sa 1 araw, tawagan ang iyong tagapangalaga ng kalusugan.

• Magrelaks at humiga. Matulog kung gusto mo. Basta bumangon ka at magpahinga. Uminom din ng maraming likido upang maiwasan ang dehydration.

• Uminom ng acetaminophen o mga nonsteroidal anti-inflammatory drug (mga NSAID), tulad ng ibuprofen.

Paggamot sa baradong ilong

• Sumanghab ng singaw o pinainit na mahalumigmig na hangin para mabuksan ang mga baradong daanan sa loob ng ilong. Tumayo sa mainit na shower o gumamit ng vaporizer. Mag-ingat na hindi mapaso ng singaw.

• Tumutulong ang mga saline nasal spray at tabletang decongestant o nasal spray na buksan ang baradong ilong. Maaari ding makatulong ang mga antihistamine. Pero maging maingat sa masasamang epekto. Kasama rito ang pagkaantok at panunuyo ng mga mata, ilong, at bibig.

Paginhawahin ang masakit na lalamunan at ubo

• Magmumog tuwing  2 oras na may  1/4 kutsarita ng asin na tinunaw sa  1/2 tasa ng maligamgam na tubig. Sumipsip ng throat lozenges at cough drops para mapaginhawa ang iyong lalamunan.

• Magagamit ang mga gamot sa ubo. Pero hindi malinaw kung gaano kahusay gumagana ang mga ito.

• Uminom ng acetaminophen o isang NSAID, tulad ng ibuprofen, para gumaan ang pananakit ng lalamunan. Sundin ang mga tagubilin sa pakete tungkol sa kung gaano karami ang gagamitin at gaano kadalas iinumin ang gamot.

Paginhawahin ang mga problema sa panunaw.

• Ibalik ang mga likido sa iyong katawan. Madalas na humigop ng mga malinaw na likido, tulad ng tubig o sabaw. Umiwas sa mga inumin na may maraming asukal. Kasama rito ang mga juice at soda. Maaaring palalain ng mga ito ang pagtatae. Maaaring uminom ng mga sports drink ang mas malalaking bata at mga adulto.

• Kapag bumalik na ang iyong gana sa pagkain, maaari ka nang bumalik sa normal mong diyeta. Tanungin ang iyong tagapangalaga ng kalusugan kung may anumang pagkain na dapat mong iwasan.

Kailan dapat tumawag sa iyong tagapangalaga ng kalusugan

Kapag una mong napansin ang mga sintomas, magtanong sa iyong tagapangalaga kung dapat kang uminom ng anumang inireresetang gamot. Hindi dapat inumin ang mga antibayotiko para sa sipon o trangkaso. Tumawag din sa iyong tagapangalaga ng kalusugan kapag mayroon ka ng alinman sa mga sintomas na ito:

• Hindi ka gumagaling pagkaraan ng 7 araw

• Pananakit ng tiyan o pagsusuka

• Lumulubhang mga sintomas, lalo na pagkatapos ng panahon ng paggaling

• Lagnat na  100.4° F ( 38°C) o mas mataas, o lagnat na hindi bumaba sa pamamagitan ng gamot, o ayon sa ipinayo ng iyong tagapangalaga

• Pagkahilo o panghihina

• Bahagyang kakapusan ng paghinga o paghingasing

• Batik-batik, namumula, o napakasakit na lalamunan

• Mga senyales ng pagkawala ng tubig sa katawan:

  • Labis na pagkauhaw

  • Maitim na ihi

  • Hindi umiihi nang madalas

  • Tuyong bibig

Kailan dapat tumawag sa 911

Tumawag sa 911 kaagad kung mangyari ang alinman sa mga ito:

• Pananakit ng dibdib

• Pag-ubo ng dugo

• Mabilis o hindi regular na tibok ng puso

• Matinding kahirapan sa paghinga

• Biglaang pagkalito, pagkahimatay, o pagkawala ng malay