Fason pou W Jere Estrès
Gen plizyè fason ou ka jere estrès. Premyèman, aprann rekonèt lè w estrese epi kisa ki deklanche l. Apre sa a, jwenn mwayen pozitif pou w reyaji ak deklanchè w yo. Asire w ou byen pran swen sante w epi pran tan pou w detann ou. Li sa yo pou w aprann plis sou fason pou w jere estrès yo.
Rekonèt estrès
Aprann rekonèt estrès ou epi chèche konnen kisa ki deklanche l. Pou w fè sa a, eseye konnen ki jan ou santi w chak jou. Si w remake kè w ap bat vit oswa misk ou yo pi rèd, kò w petèt ap reyaji anba yon estrès. Mande tèt ou poukisa. Epi apre sa a ekri repons ou a. Pou kontinye pwosesis la, fè lis tout bagay ki deklanche santiman estrès yo.
Mennen yon vi sen
Kenbe tèt ou an sante ede w jere estrès pi byen. Sa vle di dòmi ase, byen manje, ak fè egzèsis. Sa vle di tou konnen kisa ou plis apresye nan lavi, epi gen tan pou tèt ou. Ekri yon jounal sante chak jou pou w wè si w fè bagay sa yo. Apre sa, li jounal ou a chak semèn. Si ou pa byen pran swen tèt ou, ou ka plis estrese.
Pi byen reyaji ak estrès
Lavi plen bagay estresan ou pa ka kontwole. Men, ou ka aprann plis fason pozitif pou w reyaji ak yo. Sa ap ede w santi w plis gen kontwòl sitiyasyon an. Pou kòmanse, eseye konsèy sa a: Reflechi ak efò ou vle fè pou w ka jere kèk bagay ki ka pwovoke estrès. Èske ou reyèlman bezwen jere bagay estresan sa? Si wi, deside sou ki pi bon fason pou w fè sa. Chanje sa w ka chanje. Men, si bagay estresan an pa enpòtan, oswa si li pa depann de ou, nan ka sa a, poukisa w ap enkyete w pou sa a?
Detann ou pou w kalme w
Detant ka ede w evite oswa soulaje santiman estrès yo. Konsèy sa a ka ede w tou: Lè w ap fè fas ak yon bagay estresan, eseye pranyon poz pandan yon moman. Epi apre, rale yon gwo souf epi lage l tou dousman pandan w ap konte jiska 10. Sa ap ede w vide lespri w pou w ka reyaji pi byen ak estrès.
© 2000-2025 The StayWell Company, LLC. All rights reserved. This information is not intended as a substitute for professional medical care. Always follow your healthcare professional's instructions.