Mga Pangmatagalang Komplikasyon ng Diyabetis

Mga posibleng komplikasyon

Maaaring magdulot ang diyabetis ng:

• Mga problema sa mata. Kabilang sa mga ito ang mga pinsala sa mga daluyan ng dugo sa mga mata, presyon sa mata, at maulap na lente ng mata. Maaaring humantong sa pagdurugo at pagkabulag ang mga problema sa mata sa paglipas ng panahon. 

• Mga problema sa ngipin at gilagid. Maaaring maging sanhi ang mga ito ng pananakit, impeksiyon, o pagkalagas ng mga ngipin at pagliit ng buto.

• Sakit sa daluyan ng dugo. Maaari itong humantong sa mga problema sa sirkulasyon ng dugo, atake sa puso, o stroke. Maaari mong kailanganin ang pagputol ng isang biyas mo dahil sa mahinang pagdaloy ng dugo sa balat.

• Mga problema sa sekswal na paggana. Kabilang dito ang erectile dysfunction at nasasaktan sa pagtatalik. 

• Sakit sa kidney. Maaari itong humantong sa pagpalya ng kidney. Maaaring kailanganin mo ang dialysis o pag-transplant ng kidney kung mangyari man ito. 

• Mga problema sa nerbiyo. Maaaring magdulot ang mga ito ng pananakit o pagkawala ng pakiramdam sa iyong mga paa at iba pang bahagi ng iyong katawan. Maaari itong humantong sa pagputol ng biyas. Maaari ding magdulot ng pagkawala ng pandinig ang pagkasira ng nerbiyo.

• Mataas na presyon ng dugo. Ang problemang ito ay nagdudulot ng kapaguran sa iyong puso at sa mga daluyan ng dugo.

• Malulubhang impeksiyon. Maaaring humantong ang mga ito sa pagkawala ng mga daliri sa paa, paa, o biyas.

• Sakit na matabang atay na hindi dahil sa alak. Pinatataas ang panganib sa malubhang pagdami ng taba sa atay ang pagkakaroon ng type 2 na diyabetis.

• Mga problema sa kalamnan at buto. Kabilang rito ang carpal tunnel syndrome, naninigas na balikat, mga Dupuytren contracture sa mga daliri, mga bali at osteoporosis.

Paano maiiwasan ang mga komplikasyon

Maaari kang tumulong na maiwasan ang mga malubhang komplikasyong ito sa pamamagitan ng pagkontol sa asukal ng iyong dugo, presyon ng dugo, at kolesterol. Makakatulong ito sa iyo na mas bumuti ang pakiramdam at manatiling malusog. Maaari kang tumulong na makontrol ang diabetis sa pamamagitan ng pagsubaybay sa iyong mga lebel ng asukal sa dugo ayon sa ipinayo ng iyong tagapangalaga ng kalusugan.

Kumain ng masusustansyang pagkain at mag-ehersisyo upang mapigilan ang pagtaas ng timbang. Itigil ang lahat ng produktong tabako kung naninigarilyo ka. Lubos itong makakapagpabuti ng iyong pangkalahatang kalusugan.

Pumunta sa lahat ng iyong mga appointment sa pangangalagang pangkalusugan. Gawin ang inirerekomendang mga pagsusuri sa kalusugan, gaya ng mga pagsusuri sa dugo at ihi, pag-screen ng presyon ng dugo, pagsusuri sa mata, paa, ngipin, at kalusugan ng buto. At manatiling napapanahon sa inirerekomendang mga bakuna. Itanong sa iyong tagapangalaga ng kalusugan kung ano ang mga bakuna na dapat mayroon ka.

Mahalagang uminom ng gamot ayon sa itinagubilin ng iyong tagapangalaga ng kalusugan. Sabihin ang anumang masasamang epekto ayon sa ipinayo ng iyong tagapangalaga. Sabihin din sa iyong tagapangalaga kung mayroon kang problema sa pagpapanatiling malusog ang mga lebel ng asukal sa dugo.